روزنامہ تکمیل ہر خبر کی دلیل
سال 1947میں ملک کے معرض وجود میں آنے کے بعد سے اب تک کسی بھی منتخب وزیر اعظم نے اپنی پانچ سالہ مدت پوری نہیں کی اور عمران خان اس فہرست میں شامل 19ویں شخص ہیں۔عمران خان پہلے وزیراعظم ہیں جنہیں عدم اعتماد کی قرارداد کے آئینی اقدام کے ذریعے ہٹایا گیا ہے۔
یہ بھی پڑھیں:پاکستان میں تحریک عدم اعتماد لائی گئیں ،کتنی کامیاب ہوئیں
ملک کے سب سے پہلے وزیر اعظم لیاقت علی خان کو 16 اکتوبر 1951 کو قتل کر دیا گیا تھا۔ ان کے بعد 7 وزرائے اعظم مستعفی ہوئے، 5 کو برطرفی کا سامنا کرنا پڑا، جب کہ 4 وزرائے اعظم کی حکومتیں فوجی بغاوتوں کے ذریعے معزول کر دی گئیں۔ نواز شریف اور یوسف رضا گیلانی وہ دو افراد تھے جنہیں سپریم کورٹ کی جانب سے سزا سنائے جانے کی باعث نااہل قرار دیا گیا تھا۔ شوکت عزیز، راجا پرویز اشرف اور شاہد خاقان عباسی وہ اشخاص ہیں جنہوں نے قومی اسمبلی کی 5سالہ مدت پوری ہونے پر عہدہ چھوڑا لیکن انہوں نے اپنے پیش رووں کی نااہلی اور استعفیٰ کے بعد باقی ماندہ مدت پوری کرنے کے لیے ہی یہ عہدہ سنبھالا تھا۔ اس فہرست میں شامل نواز شریف جو وہ واحد شخص ہیں جنہیں اپنے تین ادوار میں چار مرتبہ ملک کا اعلیٰ عہدہ چھوڑنا پڑا۔البتہ نواز کو وزیر اعظم کے دفتر میں 3,4223 ہزار 422 روز کے ساتھ سب سے طویل قیام کا کریڈٹ جاتا ہے۔ عمران خان ایک ہزار 335 روز کے ساتھ دفتر میں گزارے گئے دنوں کی تعداد کے لحاظ سے چھٹے نمبر پر ہیں، ان سے پہلے بے نظیر بھٹو، لیاقت علی خان، یوسف رضا گیلانی اور ذوالفقار علی بھٹو ہیں۔
